Atlete ruk op teen ASA
2009-11-06 15:12
Johannesburg - Top Suid-Afrikaanse atlete en 'n nasionale afrigter het opgeruk teen Atletiek Suid-Afrika (ASA) oor beweerde onbevoegtheid.
Baie van die kritiek in 'n gesamentlike verklaring draai om die spanbestuurders by die Wêreldkampioenskappe wat in Augustus in Berlyn gehou is, die ASA-president, Leonard Chuene se persoonlike assistent, Humile Bogatsu, en ASA se geleentheidsbestuurder Phiwe Mlangeni-Tsholetsane.
Chuene, Bogatsu en Tsholetsane is Donderdag saam met ander ASA-werknemers, raadslede en die algemene bestuurder, Molatelo Malehopo, deur Suid-Afrika se Sportkonfederasie en Olimpiese Komitee (Sascoc) geskors vir die hantering van die Caster Semenya-saga.
'n Groep werknemers van ASA wat geskors is kruip nog weg, maar sentrale figure in die Semenya-debakel het Vrydag geweier om Vrydag kommentaar te lewer. Daar is vroeër berig dat hulle Vrydag sou vergader om dié situasie te bespreek.
Van die atlete, waaronder Paul Gorries, Magda Botha, die span se naelloopafrigter, en Nicolene Cronje, Suid-Afrika se eerste vroulike stapper by die Olimpiese Spele in Athene in 2004, het ASA van rassisme en wanbestuur beskuldig.
Cronje, wat weens chroniese moegheidsindroom (CMS) sedert 2007 nie meer
deelneem nie, sê Malehopo het haar in 2007 by die Junior
Wêreldkampioenskappe in Kingston, Jamaika aangerand.
"Molatelo
Malehopo het my, Snowy Matthews en Magda Botha eenkant geroep en sy
humeur verloor. Hy het my telekemale in my gesig geklap. Snowy moes
tussen ons kom om hom te keer."
"Die volgende dag het Leonard
Chuene my geroep en gevra wat gebeur het. Ek het hom vertel en sy woorde
aan my was: 'My kind, as jy dit ooit vir jou familie of die media sê, is
jou atletiekloopbaan daarmee heen. Ons maak of dit nooit gebeur het
nie'."
Cronje het gesê sy het gehoop om weer deel te neem, maar was bekommerd oor die stand van die sport.
"Daar is so baie wat in Suid-Afrikaanse atletiek gebeur en ek is nie seker of ons ooit die waarheid sal hoor nie," het sy gesê.
"Borge onttrek, goedkoop klere word aan atlete gegee, geld verdwyn, atlete word sleg behandel...en die lys gaan aan."
'n Atleet wat ook in Berlyn asook die 2004 en 2008 Olimpiese Spele
deelgeneem het, wat anoniem wil bly, het gesê vanjaar se Wêreldkampioenskappe
"was die ergste ooit".
Die atleet sê daar was "geen kommunikasie" van die bestuur nie.
Botha het op haar beurt gesê die spanbestuurders het geen ondervinding nie.
Sy
het gesê die toetse wat op Semenya gedoen is, is "heeltemal verkeerd"
hanteer en dat Chuene, wat later sy leuens erken het, die span probeer
dwing het om die bestuur se gemors toe te smeer.
"In die laaste
vergadering voor ons terugkeer het Leonard ons probeer oortuig dat die
atletiekspan die beste bestuur in die geskiedenis van ASA het. Hy het
gesê as ons 'n probleem het, moet ons onthou dat ons 'n familie is en
dat 'n familie nie uitpraat nie."
"Dit was duidelik wat probeer sê - dat niks van Berlyn met enigeen bespreek moet word nie."
Gorries, wat aan die 4X400m-aflos in Berlyn deelgeneem het, het gesê, "hulle was magsbehep - wou heeltyd vir die atlete wys wie is baas".
"Phiwe weet niks van atletiek nie. Haar kommentaar het dit duidelik uitgewys. Hendrick (Mokganyetsi, spanbestuurder) was aggressief teenoor almal en het baie verkeerde besluite gemaak."
"Humile is niks meer as 'n sekretaresse nie. Sy weet niks oor hoe om 'n span te bestuur nie. Sy is ook heen en weer tussen Duitsland en Suid-Afrika op ASA se onkoste gevlieg (om eksamen te skryf)."
"Ons is gestraf omdat ons volgens hulle nie vir Caster ondersteun het nie, maar nie een van hulle was by Khotso (Mokoena) of Mbulaeni (Mulaudzi) se medaljeseremonies nie."
– Sapa