Atlete eis 50%-verteenwoordiging in ASA-raad
2009-11-21 10:34
Wilhelm de Swardt
Pretoria - Atlete gaan aandring op minstens 50%-verteenwoordiging in die tussentydse raad van Atletiek Suid-Afrika (ASA) wat vandag by die Suid-Afrikaanse Sportkonfederasie en Olimpiese Komitee (Saskok) se hoofkantoor in Johannesburg verkies word.
Arnaud Malherbe van die nuut gestigte Suid-Afrikaanse atletekomitee het gesê: “Ons as atlete is erg teleurgesteld in die huidige stand van Suid-Afrikaanse atletiek. Ons voel dat ASA se huidige bestuur die sport se beeld net skade berokken.
“Weens hul swak bestuur het atletiek baie goeie borge verloor en is niemand meer seker wat die toekoms vir die sport inhou nie.
“Die administrateurs van sekere provinsies stel glad nie die belange van die atlete voorop nie, maar is eerder betrokke vir die voordele wat dit vir hulself inhou.
“ As die hoofaandeelhouers van Suid-Afrikaanse atletiek voel atlete dat ons nou die kans moet kry om die sport te bestuur en die beeld van atletiek te verbeter.
“Ons steun Saskok se besluit om mnr. Ray Mali tydelik aan die stuur van ASA te plaas.
“Ons wil atletiek weer die vlagskip van Suid-Afrikaanse Olimpiese sport te maak.”
Ruben Ramolefi, Olimpiese atleet, het geê atletiek het mense met vernuwende idees nodig om die trots in die sport terug te bring.
Atletiek Sentraal-Noordwes het eergisteraand die leiding geneem op ’n spesiale vergadering in Potchefstroom toe hy Hezekiel Sepeng, die eerste swart Suid-Afrikaanse atleet om ’n medalje by ’n Olimpiese Spele te wen, tot vise-voorsitter van sy tydelike raad verkies het.
Shaun Bownes, ook ’n Olimpiese atleet, gaan ook in die raad dien.
– Die Burger