Arran Brown maak weer so in 94.7-ren
2011-11-21 10:02
Pretoria – Arran Brown (MTN-Qhubeka) het Sondag met sy sege in Momentum se 94.7-uitdaagfietsren verseker sy eie voorspelling word waar.
Brown het dié ren in en om Johannesburg in 2 uur 11 minute en 47 sekondes gewen. Hy oorheers dié ren al die afgelope drie jaar. Verlede jaar was hy tweede en in 2009 het hy gewen.
Reinardt Janse van Rensburg (MTN-Qhubeka) was tweede en Tyler Day (Bonitas) derde.
Ashleigh Moolman-Pasio (Nashua-Toyota) het seker gemaak sy wen die vroue-ren deur Cherise Taylor (USN) in ’n naelrit na die eindstreep te klop.
Eintlik is Brown se sege geen verrassing nie.
Hy het al in Augustus gesê hy het net een doelwit en dit is om dié ren te wen. “Ek het geweet ek kon. Al my voorbereiding was daarop geskoei om op my beste vir dié ren te wees.”
Só ernstig was Brown dat hy die afgelope maand feitlik pal op dié roete gaan oefen het. “Ek wou niks aan die noodlot oorlaat nie.”
Die beslissende oomblik was toe ’n groep van agt jaers – drie van MTN-Qhubeka en vyf van Bonitas – teen die laaste klim in die stad weggekom het.
Brown en Janse van Rensburg sê hulle was aanvanklik bekommerd.
“Ons het gedink omdat daar meer Bonitas-jaers in die breek was, sou hulle probeer om ons moeg te ry,” sê Brown. “Maar hulle het verkies om eerder op Tyler Day se naelry vermoëns staat te maak. Dit het ons soos ’n handskoen gepas.”
In die finale naelrit het Brown presies op die regte oomblik versnel en seker gemaak hy jaag die gevreesde verkeersirkel eerste binne.
Daar is vooraf voorspel dit is die plek waar die ren gewen of verloor sou word en dit was toe ook so.
Day het agterna geen verskonings gehad nie. “Ek was net nie goed genoeg nie. Arran en Reinardt was supersterk en het verdien om te wen.”
Herman Fouché (Cape Town Market) en Nolan Hoffman (Tasol-GT) was die dag se twee groot verloorders. Hulle is aan die slaap gevang toe die agt jaers in ’n breek weggekom het en al het hulle hoe hard probeer, kon hulle net nie weer die voorlopers inhaal nie.
Moolman-Pasio sê sy, Taylor, Jo-Anne van Winkel (Nashua-Toyota) en Lisé Olivier (MTN-Qhubeka) was 80 km lank voor.
Dit was die tweede keer dat Pasio-Moolman aan dié ren deelgeneem het.
Verlede jaar was sy vyfde.
“Ek het nie verwag om te wen nie,” het sy gesê. “Dit was een van daardie dae dat my bene nie wou saamwerk nie.
“Gelukkig het ek genoeg krag oorgehad om baas te wees in die naelrit.”
Vir die jongste sportnuus volg Nuus24Sport op Twitter.
– Sport24