Armstrong-spanmaat geskors oor opkikkers

2012-10-17 12:06

Sydney – Fietsry Australië (CA) het Matthew White Woensdag geskors nadat dié fietsjaer erken het dat hy opkikkers gebruik het toe hy tien jaar gelede saam met Lance Armstrong vir die US Postal-span gejaag het.

White (38) is reeds uit Australië se nasionale padfiets- asook die beroepspan Orica GreenEDGE geskors.

Hy is in Usada se verslag oor Amstrong betrek as een van die US Postal-jaers wat die verbode middel EPO en testosteroon gebruik het.

Fietsry Australië het in 'n uitgereikte verklaring ook die kritiek, dat die CA te veel vertroue in die Internasionale fietsryvereniging (UCI) geplaas het, aangespreek.

"CA is ook onlangs voor stok gekry wat betref ons openbare ondersteuning van die UCI en sy inisiatiewe om opkikkergebruik in die sport uit te roei," het die verklaring gelui.

"Ons erken dat daar nou duidelike bewyse is dat die UCI tot onlangs daarin misluk het om sy deel te doen in die stryd teen opkikker-gebruik.'

Vir die jongste sportnuus volg Nuus24Sport op Twitter.

- Sapa-DPA