Armstrong gesels met Oprah oor opkikkers

2013-01-09 10:29

Los Angeles – Die omstrede fietsryer Lance Armstrong gaan volgende week oor sy opkikker-skandaal gesels in ‘n onderhoud met Oprah Winfrey.

Winfrey het Dinsdag bekend gemaak dat ‘n program van 90 minute oor “jare van beskuldigings van oneerlikheid, en die aantygings van leuens en die gebruik van opkikkers” in Armstrong se roemryke loopbaan, verfilm sal word.

Dit sal Armstrong se eerste onderhoud wees sedert sy sewe Tour de France-titels verlede jaar by hom afgeneem is. Die onderhoud sal op die Oprah Winfrey Network verskyn.

The New York Times het verlede week berig dat die 41-jarige Armstrong dit oorweeg om te erken dat hy opkikkers gebruik het sodat hy weer aan mededingende sport soos marathons en driekampe kan deelneem.

“Sien uit na my gesprek met @lancearmstrong,” het Winfrey Dinsdag op Twitter gesê.

Die Internasionale Fietsryvereniging (ICU) het Armstrong se naam laat verlede jaar effektief uit die geskiedenis van fietsry gewis toe die vereniging besluit het om nie appèl aan te teken teen 'n verdoemende verslag deur die Amerikaanse agentskap teen verbode middels (Usada) nie.

Die verslag het vertel hoe Armstrong gereeld opkikkers gebruik het.

Armstrong het tot dusver ontken dat hy enige opkikkers gebruik het.

Die onderhoud sal in Armstrong se huis in Austin, Texas plaasvind.

– Vir die jongste sportnuus volg Nuus24Sport op Twitter.
 

- Sapa - AFP