Armstrong bieg dalk oor opkikkers

2013-01-05 11:19

New York – Die bekende fietsryer Lance Armstrong, wie se sewe Tour de France-titels by hom afgeneem is omdat hy verbode middels gebruik het, oorweeg dit glo om te erken dat hy wel opkikkers geneem het, het The New York Times Saterdag berig.

Armstrong het aan kollegas en beamptes gesê hy oorweeg dit om in die openbaar te erken dat hy bloedoortappings en verbode middels gebruik het om sy prestasies te verbeter, het die koerant berig.

Die koerant het nie sy bronne onthul nie, maar het "verskeie mense met direkte kennis van die situasie" aangehaal.

Die Internasionale Fietsryvereniging (ICU) het Armstrong se naam laat verlede jaar effektief uit die geskiedenis van fietsry gewis toe die vereniging besluit het om nie appèl aan te teken teen 'n verdoemende verslag deur die Amerikaanse agentskap teen verbode middels (Usada) nie.

Die verslag het vertel hoe Armstrong gereeld opkikkers gebruik het.

Armstrong het tot dusver ontken dat hy enige opkikkers gebruik het.

– Volg Nuus24Sport op Twitter.

- SAPA