Argus kry dalk weer wind van voor
2010-03-12 09:31
Kaapstad – Weerprofete het gewaarsku dat deelnemers aan vanjaar se Cape Argus Pick n Pay-fietstoer hulle Sondag sal moet staal teen 'n sterk suidooste wind.
Volgens weervoorspellings kan die wind moontlik vanjaar net so sterk waai soos verlede jaar, toe deelnemers veral by Chapmans Piek en Kampsbaai erg teen die wind moes baklei.
'n Suidooste wind van tussen 40 en 50 km/h word op die fietsroete verwag.
“Die windspoed mag in sommige plekke tot 60 km/h wees,” het Carlton Fellis van die Suid-Afrikaanse weerdiens in Kaapstad gesê.
David Bellair, mede-direkteur van die Cape Argus Pick n Pay-fietstoer, het gesê ‘n hele aantal deelnemers het besluit om nie vanjaar deel te neem nie deels omdat die wind so sterk gewaai het verlede jaar.
Bellair het gesê die wind was verlede jaar op sy sterkste in die middestad waar die wind op plekke 120 km/h bereik het, maar hy het sy hoop uitgespreek dat die Kaapse dokter Sondag 'n bietjie meer genade sal toon.
- Sport24