Argus: Kleuters én kaalbasse deel in fietsrypret
2011-03-13 07:59
Kaapstad - Van kleuters tot kaalbasse het die afgelope naweek gedeel in die opwinding voor Sondagoggend se Cape Argus-fietstoer.
Maar alle grappies was op ’n stokkie toe die 35 000 deelnemers vroeg Sondagoggend in die Kaapse middestad weggespring het.
Dit was 34 475 meer fietsryers as wat met die eerste wedren in 1978 deelgeneem het – toe net 525 dié fietswedrenroete aangedurf het.
Twee Kapenaars het in 1978 met die idee vir dié wedren vorendag gekom toe hulle skielik die behoefte aan fietspaaie – nou fietsbane – in die stad raak gesien het.
Die 109 km lange roete word vanjaar vir die 34ste keer aangedurf – van die middestad tot in Simonstad en weer kuslangs oor Chapmanspiek tot by die Kaapstad-stadion.
In vorige jare was die roete gewoonlik tussen 104 km en 110 km lank en fietsryers het ’n sirkelroete om die Kaapse Skiereiland en terug gevolg.
In 1978 was die eerste manswenner Lawrence Wittaker met ’n tyd van 3:02:25.4; en die eerste vrouewenner Janice Theis met ’n tyd van 4:35:00. Albei is Suid-Afrikaners.
In 2002 was dit so warm dat die wedren omstreeks 15:00 op Ou Kaapse weg gestaak is. Temperature van 42°C is aangeteken.
Selfs die 132 000 liter Coke, 45 000 liter energiedrankies en 60 000 liter water wat op dié dag gedrink is, het geen beskerming teen sonsteek gebied nie.
In 2009 is die fietstoer om 16:30 by Chapmanspiek gestaak weens ’n wind van oor die 100 km/h wat ryers van hul fietse afgeruk het.
Willie Engelbrecht is die man wat die Argus al die meeste gewen het – vyf keer.
Anriëtte Schoeman is die voorste vrouewenner met ses titels in haar saalsakkie.
- Rapport