Amerikaner aan die brand by Britse Ope
2012-07-21 09:22
Lytham – Die Amerikaner Brandt Snedeker is die huidige voorloper by die Britse Ope ná ’n foutlose 64 (6 houe minder as die baansyfer) wat 6 voëltjies insluit.
Die 31-jarige het Vrydag se perfekte speeltoestande beter as sy teenstanders benut.
Snedeker se 64 ewenaar die baanrekord en die telling waarmee die Australiër Adam Scott Donderdag die voortou geneem het.
Sport24 berig dat Ernie Els (70) 7 houe agter die voorloper is. Saam met Els sal die Suid-Afrikaners Louis Oosthuizen, Branden Grace, Richard Sterne, Retief Goosen en Garth Mulroy bly vir die naweek.
Grant Veenstra, Andrew Georgiou, Trevor Immelman, Tim Clark, Charl Schwartzel, George Coetzee en Jbé Kruger se toernooi is egter verby. Die verdedigende kampioen, Darren Clarke, en 2009-wenner, Stewart Cink, is ook op pad huis toe.
Vir die jongste sportnuus volg Nuus24Sport op Twitter.
– Sport24
