'Alles was een groot leuen' – Lance Armstrong

2013-01-18 06:25

Los Angeles – Die Amerikaanse fietsryer Lance Armstrong het in 'n onderhoud met die kletskoningin Oprah Winfrey gesê hy is "jammer" dat hy opkikkers gebruik het en dat dit 'n fout was.

Die onderhoud is Donderdagaand in Amerika uitgesaai en word in twee episodes Vrydagaand en Saterdagaand in Suid-Afrika uitgesaai.

"Ek het my besluite geneem. Dit is my fout en ek sit vandag hier om dit te erken en om te sê ek is jammer daaroor," het die sewemalige Tour de France-wenner gesê.

"Die kultuur was wat dit was."

Armstrong het in die onderhoud met Winfrey vir die eerste keer erken dat hy verbode middels gebruik het om sy fietsry-vertoning te verbeter.

Hy het "ja" geantwoord toe Winfrey hom gevra het of hy bloedoortappings gedoen en ondermeer EPO en testosteroon gebruik het om sy sewe Tour de France-titels te wen.

"Ek beskou die situasie as een groot leuen wat ek verskeie kere herhaal het," het Armstrong gesê.

Hy het verder gesê dit is in sy opinie onmoontlik om 'n wedren te wen sonder om onwettige middels te gebruik.

Die fietsry-ster het egter ontken dat hy met sy terugkeer tot die sport in 2009 verbode middels gebruik het.

Armstrong, wat van al sy toekennings vanaf Augustus 1998 gestroop is, het aan Winfrey gesê hy was kwaad oor die Amerikaanse agentskap teen verbode middels (Usada) se klag dat hy steeds verbode middels gebruik het toe hy tot die sport teruggekeer en in 2009 en 2010 aan die Tour de France deelgeneem het.    
       
– Volg Nuus24Sport op Twitter

- Sapa - AFP