Ali se familie verwerp sterfbed-gerugte

2013-02-04 12:49

New Orleans – Die bokslegende Muhammed Ali se dogter het gerugte die nek ingeslaan dat haar pa op sy sterfbed is en gesê hy het Sondag nog die Superbowl-wedstryd tussen die Baltimore Ravens en die San Francisco 49'ers by sy huis in New Orleans gekyk.

May May Ali het gesê sy het Sondagoggend met haar pa oor die foon gepraat en dat alles in orde was.

"Alles is reg, hy was vanoggend eintlik heel gesellig gewees," het sy in 'n telefoniese onderhoud gesê.

"Sulke gerugte doen maar elke nou en dan die ronde."

Die voormalige swaargewig-kampioen se familie het later 'n foto van Ali, wat in 'n Baltimore Ravens-hemp op 'n stoel sit, op Twitter geplaas.

Die gerugte is deur 'n Britse poniekoerant versprei wat berig het dat Ali se broer, Rahman, gesê het sy toestand die afgelope tyd het drasties agteruitgegaan en dat hy op sy sterfbed is.

Rahman het egter gesê dat hy sy broer verlede jaar laas gesien het en dat hy geen kontak met die familie het nie.

Ali ly aan Parkinson se siekte. Hy het in Januarie vanjaar sy 71ste verjaardag gevier.

Volg Nuus24 op Twitter.

- Sapa - AP