Alberto Contador geskors
2011-01-27 11:14
Palma de Mallorca - Die Tour de France-kampioen Alberto Contador is Woensdag vir 12 maande deur die Spaanse fietsryvereniging geskors na sy positiewe toets vir 'n verbode middel.
Die 28-jarige het 'n kort en bondige persverklaring deur middel van sy woordvoerder uitgereik nadat hy van sy straf in kennis gestel is.
"Alberto Contador het vandag (Woensdag) kennisgewing van 'n 12 maande lange skorsing deur die Spaanse fietsryvereniging ontvang," het Contador se woordvoerder gesê.
"Daarom sal Alberto saam met Bjarne Riis (bestuurder van Contador se Saxo Bank-span) op Vrydag, 28 Januarie om 16:00 by die Hotel Son Net in Palm de Mallorca, 'n perskonferensie hou om hul opinie oor die kwessie bekend te maak."
Die Spanjaard het 10 dae om appél teen die skorsing aan te teken. Indien sy appél misluk sal dit slegs die tweede keer wees wat 'n Tour de France-kampioen van sy titel gestroop word.
Die Amerikaner Floyd Landis is sy Tour-titel in 2006 kwyt nadat hy positief getoets is vir opkikkers.
Die Internasionale fietsryvereniging (UCI) het Contador verlede jaar in Augustus tydelik geskors nadat hy positief getoets het vir die verbode middel clenbuterol.
Die Spanjaard ontken dat hy verbode middels gebruik het en gee besmette vleis die skuld vir sy positiewe toets.
Vir die jongste sportnuus volg Nuus24Sport op Twitter.
- Sport24