'Aktivis-atleet' verkoop medalje
2010-10-14 11:10
San Jose, Kalifornië - Die bekende Amerikaanse atleet, Tommie Smith, wat die wêreld geskok het met sy swartmag-saluut op die wennerspodium tydens die 1968 Olimpiese Spele in Mexiko, gaan sy goue medalje verkoop.
Die 66-jarige Smith het bekend gemaak dat hy sy Olimpiese goue medalje én spykerskoene op 'n veiling gaan verkoop.
Die bod begin op $250 000 (sowat R1.7 miljoen) en sluit op 4 November.
Smith, wat in Georgia woon, wou nie met plaaslike media oor dié besluit praat nie.
Hy het die 200 m in 'n rekordtyd by die 1968 Spele gewen, maar is saam met die wenner van die bronsmedalje, John Carlos, geskors nadat hulle hul koppe laat sak en op die wennerspodium, gebalde vuiste in swart handskoene na die Amerikaanse vlag gewys het.
Bly op hoogte van al die jongste sportnuus deur Nuus24Sport op Twitter te volg.
- Sport24