'Afrika-atlete gaan hoogtepunte op Spele lewer'
2012-02-09 09:30
Pretoria. – Afrika se atlete gaan van die groot hoogtepunte op die Olimpiese Spele in Londen lewer.
Só voorspel Sebastian Coe, voorsitter van die komitee wat verantwoordelik is vir die beplanning van die Olimpiese en Paralimpiese Spele.
“Ek is seker subjektief wanneer ek oor Afrika se atlete praat,” het Coe Woensdag in ’n telefoniese onderhoud gesê.
“Maar as ’n voormalige Olimpiese atleet kan ek nie anders nie as om groot respek vir die vertonings van Afrika se middelafstand- en langafstand-atlete te hê.
“Dit is regtig opwindend. Afrika se atlete gaan waarskynlik op die Spele in al die nommers van die 800 tot die marathon medaljes wen. Ek hoop ek kry tyd om hulle in aksie te sien.
“In die lig van dié oorheersing, dink ek dit is ’n móét dat die Olimpiese Spele ’n slag in Afrika aangebied word. Daar moet weggedoen word met die gebruik om die Spele elke keer in ’n wêreldstad aan te bied.
“’n Spele in Afrika sal ’n manier wees om dié vasteland se atlete se opwindende bydrae tot internasionale atletiek te vier.
“Ek dink daaraan om my ná die Londen-spele daarvoor te beywer om ’n Spele in Afrika ’n werklikheid te maak.”
Coe het in 1980 in Moskou en 1984 in Los Angeles goue medaljes in die 1 500 m gewen. Op albei dié Spele het hy ook ’n silwermedalje in die 800 m gewen.
Volgens Coe is een van hul grootste doelwitte met die aanbied van die Londen-Spele om ’n gevoel van internasionale samehorigheid by die jeug aan te wakker.
Volgens Coe verloop die finale voorbereiding vir die Spele tot dusver nog volgens plan.
Hy sê ook hy onthou Zola Budd nog goed.
“Ek het destyds jammer gevoel vir haar. Sy het ’n politieke pion geword sonder dat sy daarvoor gevra het,” het Coe gesê
“Ek kan maar net hoop dat geen atleet ooit weer só misbruik word nie.”
Vir die jongste sportnuus volg Nuus24Sport op Twitter.
– Sport24