Afrigter die joos in oor Cheyne nie kans kry
2010-03-04 09:41
Wilhelm de Swardt
Pretoria - Dit is onverklaarbaar dat Cheyne Rahme, wat twee weke gelede die Suid-Afrikaanse junior paalspringrekord na 5.47 m verbeter het, nie Donderdagaand in Potchefstroom gaan kans kry om aan die Geelbladsye-byeenkoms deel te neem nie.
Die 18-jarige Rahme is tans een van ’n handjievol junior atlete wat werklik belofte toon.
Hoewel dit nog vroeg in die seisoen is en die meeste Europeërs nog nie regtig aan buitenshuise byeenkomste deelgeneem het nie, beklee Rahme tans die tweede plek op die Internasionale Vereniging van Atletiek Federasies (IAAF) se ranglys vir seniors.
Riaan Botha, sy afrigter, het gesê hy was twee weke gelede in Atletiek Suid-Afrika (ASA) se kantoor in Johannesburg. Daar is toe aan hom belowe dat paalspring vir mans beslis een van die nommers in die Geelbladsye-program in Potchefstroom sou wees.
Maandag moes hy hoor dat dit nie meer so is nie.
Volgens Botha moet die skuld vir die afgelope paar jaar se swak vertonings van die Suid-Afrikaanse mans-paalspringers vierkant voor die deur van ASA se besluitnemers gelê word.
Verlede jaar kon net Rahme, Botha en Okkert Brits daarin slaag om hoër as 5 m te spring. Brits en Botha het eintlik al uitgetree en neem net vir die lekker deel.
“Hoe moedig jy jong atlete aan om paalspring as sport te beoefen as daar basies geen geleentheid vir paalspringers is om deel te neem nie? Al hoe jy as paalspringer kan verbeter, is deur gereeld deel te neem. Toe ek en Okkert op ons beste was, het ons maklik 20 en meer keer in ’n seisoen deelgeneem. Die hele verlede jaar kon Cheyne net vyf keer in Suid-Afrika deelneem.”
Die Suid-Afrikaanse senior byeenkoms vind oor twee weke in Durban plaas.
Dit beteken dat Rahme, wat ’n besliste aanspraakmaker op ’n medalje op die Junior Wêreldbyeenkoms is en Suid-Afrika waarskynlik ook op die Statebondspele in Indië gaan verteenwoordig, vanjaar nog net aan twee ligabyeenkomste kon deelneem.
Die spiesgooi vir vroue behoort op vanaand se byeenkoms ’n hoogtepunt te wees.
Sunette Viljoen (61.54 m) en Justine Robbeson (60.05 m) hoop om vanaand die kwalifiserende A-vereiste van 61 m vir die Statebondspele in Indië te oortref.
- Beeld