Aflosspanne oes medaljes
2011-08-22 07:02
Pretoria – Die 4x100-mansaflosspan het Sondag op die Wêreld-studentespele in Sjenzhen, China, vir Suid-Afrika ’n tweede goue medalje losgenael.
Die 4x400-mansaflosspan was derde wat beteken dat Suid-Afrika se atlete ses medaljes (twee goud, twee silwer en twee brons) verower het.
Dit is die naasbeste vertoning tot nog toe op ’n Wêreld-studentespele.
Hannes Dreyer, Simon Magakwe, Rapula Sefanyetso en Thuso Mpuang se wentyd in die 4x100-aflos was 39.24s.
China was tweede in 39.39s en Hongkong derde in 39.44s.
Wat die 4x100-aflosspan se vertoning opwindend maak, is dat drie van die atlete (Dreyer, Magakwe en Mpuang) ook Suid-Afrika aanstaande week op die Wêreld-atletiekbyeenkoms in Daegu, Suid-Korea, gaan verteenwoordig.
James Evans, voorsitter van Atletiek Suid-Afrika (ASA), het reeds voorspel dat dié span kan verras.
Dreyer het voor sy vertrek gesê dat ’n aflos altyd een van die mees onvoorspelbare wedlope is.
“Elke spanlid moet so gefokus wees, want in ’n blote sekonde kan dinge erg skeefloop.
“As die stokkie eers geval het, is dit neusie verby, maar dan laat val selfs die gunstelinge stokkies.”
Eugene Thipe, Magakwe se afrigter, het gesê die welslae van die aflosspan op die Wêreldbyeenkoms sal afhang van hoe honger die atlete is om te presteer.
“As al vier atlete se harte groot is, twyfel ek nie dat daar ’n aangename verrassing op Suid-Afrikaanse atletiekgeesdriftiges wag nie.”
Rusland het die 4x400-aflos in 3:04.51 gewen.
Japan was tweede in 3:05.14.
Die Suid-Afrikaanse span van Shane Victor, André Olivier, Pieter Beneke en Willie de Beer se tyd was 3:05.61.
Die res van die Suid-Afrikaners wat gister in eindrondes in aksie was, se vertoning maak nie juis opwindende leesstof uit nie.
Gladwin Mzazi (5de in 21 km – 1:12.00); Zarck Visser (7de in verspring – 7.81 m); Suid-Afrikaanse 4x100-vroueaflosspan (5de – 3:34.59) en Tshamano Setone (11de in 5 000 m – 14:19.31).
– Sport24
– Bly op hoogte van al die jongste sportnuus deur Nuus24Sport op Twitter te volg