Afcon-spelers woedend oor swak speelveld
2013-01-31 14:34
Nelspruit – Togo se doelskieter Emmanuel Adebayor het die Afrika-beheerliggaam (Caf) en die plaaslike organiseringskomitee vir Afcon, hewig gekritiseer oor die toestand van die veld by die Mbombela-stadion in Nelspruit.
Die Tottenham Hotspurs-speler het oor die sanderige en ongelyke oppervlak gekla nadat sy span Woensdagaand met 1-1 gelykop gespeel het teen Tunisië.
Togo speel Sondag teen Burkina Faso in die Afrikabeker se kwarteindronde.
Zambië se kaptein, Chris Katongo, het ook vroeër die week oor die ongelyke oppervlak gekla.
"Weereens is ons in Afrika – Afcon is 'n groot toernooi vir die kontinent – die hele wêreld kyk na ons. Jy kan nie op 'n sokkerveld soos hierdie speel nie," het Adebayor gesê.
"Die stadion is van die beste wat ek nog gesien het, maar om eerlik te wees...ek is baie jammer maar dit is 'n skande vir die kontinent om op hierdie oppervlak te speel wanneer dit regoor die wêreld op televisie gewys word."
"Mense wat die wedstryd in Europa gekyk het sal later 'n sms stuur en vir my vra, 'waar speel jy, in die bos of waar?' Dit is skandelik! Ons kan beter."
Die probleem met die oppervlak het ontstaan nadat sand gegooi is as teëvoeter vir die swaar reën wat dae lank geval het – 'n skuif wat blykbaar nie deur Caf goedgekeur is nie.
"Ek dink Caf kon 'n maand vroeër kom om die veld in 'n beter toestand te kry, maar aan die einde van die dag is ons hier en nou moet ons 'n manier vind om te speel."
Vir die jongste sportnuus volg Nuus24Sport op Twitter.
- SAPA
