ASA weet glo van opkikker-voorval
2010-09-16 10:52
Johannesburg – Volgens 'n koerantberig in The Citizen is Atletiek SA (ASA) glo bewus van ‘n beweerde opkikker-voorval waarby een van Suid-Afrika se top-atlete betrokke was.
‘n Forensiese verslag deur die ouditeursfirma Deloitte en Touche beweer dat die omstrede atletiekafrigter, Ekkart Arbeit, ASA se spandokter beveel het om die voormalige naelloop kampioen, Geraldine Pillay, met 'n verbode middel in te spuit.
Volgens die verslag het ondersoekbeamptes ‘n “klein buisie waarop die naam Atovegin gedruk was” in die kantoor van die voormalige ASA-bestuurder Molatelo Malehopo ontdek.
Ondersoekbeamptes het ook e-posse gesien waarin bewys kan word dat ASA-spandokter, dr. Maaki Ramagole, Pillay na bewering in April en Mei 2008 met die verbode middel Atovegin ingespuit het.
Malehopo is verlede jaar saam met ASA se president Leonard Chuene deur die Suid-Afrikaanse Sportkonfederasie en die Olimpiese Komitee (Saskok) geskors.
Bly op hoogte van al die jongste sportnuus deur Nuus24Sport op Twitter te volg.
- Sport24