ASA-voorsitter se drie doelwitte
2011-08-01 09:09
Pretoria - James Evans, wat die naweek as Atletiek Suid-Afrika (ASA) se voorsitter verkies is, het drie doelwitte gestel wat hy voor die volgende verkiesing, teen einde April 2012, wil bereik.
“My belangrikste (doelwit) is om toe te sien dat die dag-tot-dag-werksaamhede in ASA se hoofkantoor in Johannesburg reg uitgevoer word.
“As ons dít kan regkry, behoort ASA se verhouding met onder meer die Nasionale Lotery baie te verbeter.
“Dit is ook belangrik dat daar weer ’n slag ’n ordentlike begroting vir ASA opgestel word.
“Daar kan nie voortgegaan word om die hele tyd net met krisisbeheer geld uit te gee nie, want eindelik is dit die atlete wat daaronder ly. As daar ’n begroting opgestel is, gaan die uitdaging wees om daarby te hou.”
Volgens Evans behoort dit makliker te wees om nuwe borge te werf as die bestuur van ASA ’n slag kan bewys dat hy in beheer van sake is.
“Verskeie maatskappye het al vir my gesê dat hulle daarin belangstel om atletiek te borg, maar nie terwyl daar soveel onsekerheid heers nie.”
Evans wil ook toesien dat behoorlike ontwikkelingsprogramme vir atlete en afrigters ingestel word. Hy meen SA atletiek sal daarby baat vind as dit ingestel word vir die atlete wat op vanjaar se Wêreld-jeugbyeenkoms in Lille, Frankryk, presteer het, asook vir die atlete wat op die Afrika-byeenkoms vir Juniors in Botswana uitgeblink het.
“Dit is vir my belangrik dat gereeld oefenkampe vir die jong atlete gehou word om toe te sien dat hulle reg oefen. Dit sal die atlete ook die geleentheid bied om hul probleme met ons te bespreek. Die groep moet elke twee jaar geëvalueer en aangepas word.”
Evans het gesê hy is bewus van al die beweringe oor finansiële wanbesteding in KwaZulu-Natal Atletiek. “As ek reg verstaan, is daar ’n oudit na die provinsie se geldsake aangevra.”
– Vir die jongste sportnuus volg Nuus24Sport op Twitter.
- Die Burger