ASA verleë oor webwerf-blaps

2011-04-16 10:07

Johannesburg – Die bestuurslede van Atletiek Suid-Afrika (ASA) is in die verleentheid nadat dit aan die lig gekom het dat daar op sy webtuiste na Caster Semenya, vroue-wêreldkampioen in die 800 m, as ’n man verwys word.

ASA is al twee weke lank bewus van die feitefout, maar het dit steeds teen gisteroggend nie reggestel nie.

In die voorskou vir die Suid-Afrikaanse o.23-, junior en jeugbyeenkoms wat op 2 en 3 April in Germiston plaasgevind het, word daar in ’n berig op die webtuiste geskryf dat Wilhelm van der Vyver, Roscoe Engel, Wade Jooste, Cornel Fredericks en Caster Semenya die o.23-mansatlete is om dop te hou.

Later in dieselfde berig verskyn daar wel ook in die o.23-voorskou vir vroue-atlete ’n hele paragraaf oor waartoe Semenya in staat is.

Ironies genoeg het Semenya uiteindelike glad nie eens deelgeneem nie.

ASA is binne ure nadat die berig op sy webtuiste verskyn het, per SMS-boodskap van die fout in die o.23-mansvoorskou ingelig en gewaarsku dat dit ’n verleentheid vir ASA kan word as dit nie reggestel word nie.

Die joernalis wat die artikel geskryf het, het dit as ’n onvergeefbare fout aan sy kant beskryf toe hy daarop gewys is.

James Evans, voorsitter van ASA, het reeds op die byeenkoms gevra dat dit reggestel moet word, maar dit het nie gebeur nie.

Evans het gister herhaal dat hy baie jammer is. Volgens hom het hy gedink dit is reeds op die webtuiste reggemaak.

“Ek twyfel nie dat dit ’n bona fide-fout deur die joernalis is nie.

“Dit was beslis nooit sy bedoeling om Caster Semenya in ’n verleentheid te stel nie.

“Hy was onder geweldige druk toe hy die berig geskryf het.

“Ek wil dit duidelik stel dat ASA net die grootste respek vir Caster Semenya het en dat ons nooit iets sal doen om haar te na te kom of in ’n verleentheid te stel nie.

“Caster Semenya is ’n ware ambassadeur vir Suid-Afrikaanse atletiek. Dit word bewys deur die feit dat sy een van die min atlete is wat aan byna al die Geelbladsye-byeenkomste deelgeneem het.

“Wat vir my opwindend is, is dat sy met haar deelname beslis ander atlete help om hul persoonlike beste tye te verbeter.”

Evans het ’n beroep op die media gedoen om nie net daarop ingestel te wees om sensasionele berigte oor Semenya te wil skryf nie.

“Dit bly vir my onverklaarbaar waarom daar nie meer oor haar skittervertonings op die atletiekbaan geskryf word nie, maar sodra daar dalk iets omstrede is, wil almal oor Caster Semenya skryf.”

- Sport24

- Volg Nuus24 op Twitter.