ASA in korrupsie-ondersoek
2009-11-05 17:27
Johannesburg – Atletiek Suid-Afrika het ‘n interne ondersoek gelas oor die tender, wat aan ‘n maatskappy van Phiwe Mlangeni-Tsholetsane, ASA se bemarkingsbestuurder, toegeken is.
“Ons het ‘n interne ondersoek van stapel gestuur maar benodig al die inligting voor daar verder kommentaar oor dié saak gelewer kan word,” het Molatelo Malehopo, ASA se algemene bestuurder aan Sapa gesê.
Hy wou nie verklap wie die kontrak vir die tender namens ASA onderteken het nie, óf wanneer die tender toegeken is nie.
Tsholetsane én Malehopo is deel van die groep wat deur Suid-Afrika se Sportkonfederasie en Olimpiese Komitee (Sascoc) geskors is, hangende die uitslag van 'n disiplinêre ondersoek.
Tsholetsane besit na bewering die maatskappy, wat selfoonprodukte bemark , en aan wie die tender van R600 000 toegeken is.
‘n Senior atletiek amptenaar, wat anoniem wil bly het gesê die tender was R600 000 werd en dat Tsholetsane die tender self aan haar maatskappy toegeken het, maar Tsholetsane weier om te erken dat dié maatskappy aan haar behoort.
“Ek wil geen kommentaar oor dié aangeleentheid lewer nie, dit is in die ASA se hande, ek stel voor julle kontak hulle,” het Tsholetsane gesê.
- Sport24