100ste SA Ope gaan Durban toe
2010-07-28 10:11
Johannesburg - Die swaks bewaarde geheim in Suid-Afrikaanse gholf is Dinsdag eindelik amptelik aangekondig toe die organiseerders van die Suid-Afrikaanse Ope bevestig het dat vanjaar se toernooi by die Durban-buiteklub sal plaasvind.
Die land se oudste Ope-toernooi vind van 16 tot 19 Desember die 100ste keer plaas – en groot trekpleisters soos onder andere Retief Goosen, Tim Clark, Ernie Els en die nuwe Britse Ope-kampioen, Louis Oosthuizen, behoort almal daar te speel.
Els en Clark is deel van die indrukwekkende lys van voormalige SA Ope-kampioene by die Durban-buiteklub, wat ook Bobby Locke, Gary Player, Wayne Westner en Tony Johnstone insluit.
Els het die toernooi in 1998 in die kusstad gewen, terwyl Clark suksesvol was by albei die vorige geleenthede dat die nasionale Ope in Durban was (2002 en 2005).
Die Durban-buiteklub het die SA Ope reeds 16 keer aangebied.
Dít is meer as enige ander klub in Suid-Afrika.
“Ons is verheug om die Durban-buiteklub as ons gasheer vir die 2010-toernooi te hê,” het Mbali Ngqula, besturende direkteur van die organiseerder Dlamini Weil Communications, gesê.
“In ag genome hoe ’n kleurryke geskiedenis dié baan as gasheer vir die nasionale Ope is, is dit gepas dat hy die 100ste uitgawe sal aanbied.”
Die aankondiging is met ewe veel vreugde deur die Sonskynreeks se kommissaris, Gareth Tindall, aangehoor.
“Die SA Ope het in die laaste paar jaar van krag tot krag gegaan – en dis waarlik een van die grootste sportgebeurtenisse wat nou in Suid-Afrika gehou word,” het Tindall gesê.
“Ons is verheug dat ons vanjaar na die Durban-buiteklub sal gaan vir die toernooi.
“Dis wonderlike nuus vir ons beroepspelers en verdere bewys van hoe vasberade ons is om ’n erfenis vir die SA Ope te bou, deur dit op die land se voorste bane aan te bied.”
Intussen het die Europese Reeks gister aangekondig dat sy 2010-’11-seisoen weer, soos verlede Desember, in Suid-Afrika sal begin.
Die Alfred Dunhill-toernooi buite Malelane is sedert verlede jaar die eerste toernooi in die Europese Reeks se skedule.
Vanjaar word dit van 9 tot 12 Desember beslis. Daarna volg die SA Ope, en in Januarie die Afrika-ope in Oos-Londen (6 tot 9 Januarie) en Joburg-ope (13 tot 16 Januarie).
Bly op hoogte van al die jongste sportnuus deur Nuus24Sport op Twitter te volg.
- Sport24