'n Koppie tee vir die gemoed
2010-01-04 09:07
Tokio. – Bejaardes wat daagliks verskeie koppies groentee drink, is minder geneig om depressief te voel.
Dit is waarskynlik toe te skryf aan ’n “goedvoel”-bestanddeel in die tee, sê Japannese navorsers.
Verskeie studies het groentee al met ’n verligting van psigologiese probleme verbind.
Dr. Kaijun Niu van die nagraadse fakulteit van die Tohokoe-universiteit het bevind bejaardes van 70 en ouer wat ten minste vier of meer koppies groentee per dag drink, is 44% minder geneig om simptome van depressie te toon.
Groentee word wyd verbruik in lande in die Ooste, waaronder Japan en China.
Niu en ’n navorsingspan het sowat 1 058 relatiewe gesonde bejaardes vir die studie ingespan.
Sowat 34% van die mans en 39% van die vroue het simptome van depressie getoon, luidens navorsing wat in die Desember-uitgawe van die American Journal of Clinical Nutrition gepubliseer is.
Altesame 488 deelnemers het gesê hulle drink vier of meer koppies groentee ’n dag, 284 het gesê hulle drink twee koppies ’n dag en die res een of minder ’n dag.
Die navorsers meen ’n bestanddeel in groentee kalmeer die brein.
–Reuters