iPhone 4 hier – en toe’s hy weg!
2010-09-26 14:30
Rapport
Honderde tegnologievrate het ure lank tougestaan in die hoop om een van die beperkte oplaag iPhone 4- fone te kry wat Dinsdag om middernag in Suid-Afrika bekend gestel is.
Sowel MTN as Vodacom het hul beperkte voorraad binne ure uitverkoop nadat hulle spesiaal hul grootste winkels in Johannesburg, Kaapstad en Durban geopen het vir die bekendstelling van dié foon.
By MTN se winkel in Sandton City in Johannesburg het mense drie uur lank gretig tougestaan in die hoop om ’n foon te bekom wat slegs vir kleinhandelverkope beskikbaar gestel is, sê Bridgette Bhengu, MTN-woordvoerder.
“Ons is oorbluf deur die reaksie van gebruikers wat met mag en mening by ons winkels was om ’n foon te kry. Die iPhone-manie het Suid-Afrika beslis getref, al is dit op ’n kleiner skaal as in die res van die wêreld.”
MTN het sy beperkte voorraad van 4 500 fone binne ’n dag uitverkoop en volgens Bhengu is nog besendings van die foon reeds op pad na Suid-Afrika. Vodacom was nie vir kommentaar beskikbaar nie.
Volgens Hilton Tarrant van die internetkoerant Moneyweb is daar tans na raming 120 000 iPhone-gebruikers in die land, waarvan 90 000 hul fone by Vodacom gekoop het.
Vodacom het in die verlede die alleenreg gehad om die iPhone in Suid-Afrika te versprei, terwyl die iPhone 4 deur sowel MTN as Vodacom verkoop word.
Albei selfoonreuse is gretig om die foon plaaslik te verkoop aangesien hulle baie goeie wins maak uit iPhone-gebruikers wat die iPhone as internettoestel gebruik, aldus Toby Shapshak, redakteur van die tegnologietydskrif Stuff.
Volgens data van Vodacom gebruik iPhone-eienaars gemiddeld 150 megagreep (MB) data per maand, teenoor ander slimfoongebruikers wat gemiddeld 23 MB gebruik, sê Shapshak.
Die rede vir die hoër verbruik is dat die iPhone se internet-ervaring die beste is wat op ’n slimfoon beskikbaar is, sê hy.
Al doen die iPhone wat die meeste ander slimfone kan doen, is dit die foon se gebruikersvriendelikheid, ’n kristalhelder skerm, sexy ontwerp en ’n kultusaanhang wat dit besonders maak, sê Shapshak.
- Rapport