Zuckerberg hou vriende naby, vyande nóg nader
2011-07-01 12:11
New York – Terwyl die internet-reus Google suinig vriende kies om na sy nuwe sosiale netwerk te nooi, staan 'n Trojaanse perd klaar binne sy mure.
Die Facebook-stigter Mark Zuckerberg het ‘n profiel op Google+.
Soos Forbes egter opgemerk het lyk hy nie baie gelukkig om daar te wees nie. Sy dowwe profielfoto is esteties ligjare agter die stralende glimlag wat sy Facebook-blad opkikker.
“Ek maak dinge,” stel hy homself ook kortaf op sy profiel voor.
Google se nuwe sosiale netwerk mik om Facebook se tekortkominge reg te stel en die deel van inligting meer selektief te maak.
“Nie alle verhoudings is gelyk nie,” het Google se adjunk-hoof-ingenieur Vic Gundotra vroeër vandeesweek gesê. “In werklikheid deel 'n mens dalk een ding met vriende, ‘n ander met ouers en byna niks met jou baas nie.”
Google+ is by die webadres plus.google.com te vind, maar is tans net aan ‘n handjievol mense beskikbaar en word nog getoets.
Uitnodigings om die sosiale netwerk te gebruik word per e-pos aan gebruikers gestuur.
– Lees meer hier.
– Volg Nuus24 op Twitter.