Zorro tuis by nuwe watergat
2010-07-06 10:40
Die Burger
Kaapstad - Zorro, die weerbarstige jong seekoeibul wat verlede jaar uit die Rondevlei-natuurreservaat in die Skiereiland weggeloop het, is Maandag ná ’n tamaai aankeerproses na sy nuwe tuiste buite Worcester vervoer.
Dié bulletjie is uiteindelik – ná 18 maande se rondlê in ’n dam by die Kaapse Vlakte-rioolwerke – in ’n boma vasgekeer toe hy daarbinne lusern gaan vreet het.
Vandat hy Maandag omstreeks 03:30 opgemerk is in die boma, wat opgerig is om hom te vang, is daar bontgestaan om hom te lok na ’n vraghouer wat aan die een kant van die boma deur Rigwell Machinery laat sak is. Daar is inderhaas ’n pad geskraap sodat die vragmotor met die houer daarop tot by die boma kon kom.
In een van Zorro se verskeie ontsnappingspogings Maandag het hy so byna uitgebreek.
Natuurbewaarders van die Kaapstadse munisipaliteit moes ’n bakkie teenaan die boma parkeer om die symuur, gemaak van houtbalke en planke, te stut. Zorro was nie bang vir dié bakkie nie en het selfs ’n hap uit modderskerm probeer vat.
Dr. Elzette Jordan van die Kaapstadse munisipaliteit was die veearts op die toneel. Sy het gesê Zorro kon nie met kalmeermiddels bedaar word nie omdat hy te swaar is om op te lig as hy gaan lê.
Dié bul trek nou al die skaal op sowat 1,2 ton. Die boma is gebou toe hy nog ’n jong knaap van 800kg was, en hy was nie gelukkig toe hy besef hy is daarin vasgekeer nie. Hoewel hy voortdurend van buite die boma natgespuit en lusern gevoer is, het hy sy woede telkens ten toon gestel.
Wanneer Zorro gestorm het, het mense buite die boma versigtig ver gestaan of baie vinnig in alle rigtings begin hardloop.
“As hy ’n opening sien, val hy aan en probeer uitkom. Die laaste keer het hy ’n hele deel van die boma uitgestoot en ons moes dit versterk,” het André Meriewein, ’n veldwagter, op die toneel gesê.
Meriewein het verduidelik dat ’n seekoei gevaarlik is. “’n Mens moet nooit tussen ’n seekoei en die water kom nie. Hy sal jou verpletter.”
Vroegmiddag is hy uiteindelik “oorreed” om die vraghouer waarmee hy vervoer sou word, binne te gaan.
Laatmiddag was Zorro veilig en rustig by sy nuwe tuiste, die stet Fairy Glen- private wildreservaat buite Worcester. Die bestuurder daar, Johan Botes, het gesê Zorro het gekalmeer en het hom laatmiddag reeds rustig by ’n watergat tuisgemaak.
- Volg Nuus24 op Twitter.
- Die Burger