Zille lei ook op Twitter
2013-03-05 17:52
Kaapstad – Helen Zille, leier van die DA, is een van die mees invloedryke mense op Twitter in Suid-Afrika.
Die Wes-Kaapse premier het meer as 240 000 volgelinge en het al meer as 18 000 keer getwiet. Sy is so gewild op Twitter dat talle gebruikers twiets met versoeke aan haar rig – 'n fenomeen wat deesdae op die blog cc Helen Zille gedokumenteer word.
"Vra asseblief vir die regering wat hulle doen met die geld wat ons by winkels vir plastieksakke betaal," vra een gebruiker haar op Twitter.
"Het die stad 'n bestuursplan vir duiwe?" wonder 'n ander. Zille het daarvoor bekend geword dat sy dikwels op dié vrae antwoord, en soms selfs pittig kan raak.
Dit is egter nie net op Twitter wat Zille ‘n groot impak maak nie. Meer as 223 000 mense “hou van” Zille se Facebook-blad.
Die ANC het op sy beurt slegs 15 000 aanhangers op sy Facebook-blad, terwyl 43 000 mense die party op Twitter volg.
Pres. Jacob Zuma se persoonlike Twitter-blad het wel 205 000 volgelinge. Zuma het egter nog net 88 keer getwiet.
Een van die Kabinet se meer aktiewe Twitter-gebruikers is Malusi Gigaba, minister van openbare ondernemings, wat meer as 27 000 volgelinge op Twitter het en gereeld by gesprekke betrokke raak.
‘n Sosiale media-konsultant het egter gewaarsku dat die groeiende tendens vir politici wat Twitter gebruik, gevaarlik kan raak.
“Wat hulle ook al op ‘n sosiale mediaplatform sê, moet hulle bereid wees om met ‘n megafoon voor ‘n groot skare te sê, want dit is eintlik wat jy doen,” het Samantha Fleming, sosiale media-konsultant vir Afrosocialmedia , aan News24 gesê.
– Volg Nuus24 op Twitter
