Ysmeer onder 4 km ys in Antarktika gevind
2012-02-09 19:55
Moskou – Russiese wetenskaplikes sê na meer as twee dekades se boorwerk het hulle nou die oppervlak bereik van 'n reusagtige varswatermeer in Antarktika, het RSG Donderdag berig.
Die Vostokmeer, wat onder bykans vier kilometer ys begrawe is, was vir feitlik 20 miljoen jaar van die aarde se atmosfeer afgesny.
Volgens verslaggewers het navorsers wêreldwyd gretig op die ontdekking daarvan gewag omdat sulke watermassas dalk vorms van lewe kan bevat wat nuut is vir die wetenskap.
Valery Lukin, hoof van Rusland se Antarktika-navorsingsinstituut (AARI) wat in beheer van die navorsing is, het in Woensdag se verklaring gesê sy span het die oppervlak van die dam Sondag bereik, het Associated Press berig.
“Daar is geen ander plek op aarde wat vir meer as 20 miljoen jaar in isolasie was nie,” het Lev Savatyugin, ‘n navorser van die AARI, aan die Associated Press gesê.
“Dit is ‘n ontmoeting met die onbekende.”
Savatyugin sê wetenskaplikes hoop om oeroue bakterieë te vind wat die mens se kennis oor die oorsprong van lewe kan vergroot.
“Ons moet kyk wat ons hier het voordat ons sendings na mane soos Jupiter se maan Europa kan stuur,” het hy gesê.
– Volg Nuus24 op Twitter
- AP