Wit iPhone 4 uiteindelik op die rakke
2011-04-29 14:44
Apple het Donderdag, tien maande ná die bekenstelling van die iPhone 4, uiteindelik die wit weergawe van die iPhone 4 beskikbaar gestel.
“Uiteindelik,” sê die groot letters op die iPhone-vervaardiger se webblad.
Die wit iPhone sou op dieselfde dag as die swart weergawe beskikbaar wees, maar produksieprobleme het die vrystelling vertraag.
Dit is glo juis die slimfoon se wit jas wat die probleem veroorsaak het.
Apple se wit kleed verwar glo die kamera se nabyheidsensor en veroorsaak dowwe foto’s, veral wanneer die flits gebruik word. Dié sensor skakel die raakskerm af wanneer die foon naby die gebruiker se kop gehou word, glo om batterykrag te bespaar en te verhoed dat die gebruiker se kontak met die skerm programme oopmaak.
Vorige weergawes van die iPhone het nie dié probleem gehad nie, want hulle kameras het nog nie oor flitse beskik nie.
Lees meer hier.
Volg Nuus24 op Twitter.