Afrika opgewonde oor Windows 8
2012-10-26 09:23
Video - Só lyk Microsoft se 'iPad'
Microsoft het sy mededinger vir die iPad, die nuwe Surface-tabletrekenaar, bekendgestel.
KYK
Johannesburg – Rolspelers in die Suid-Afrikaanse tegnologiebedryf het Microsoft se nuwe Windows 8 by 'n bekendstellingsgeleentheid in Johannesburg met groot belangstelling van nader beskou.
Die sagtewarereus Microsoft, wat hom deesdae meer op toestelle en rekenaarverwante dienste toespits, het die nuwe weergawe van sy wêreldbekende Windows-bedryfstelsel bekendgestel.
Bekendes soos die Olimpiese gouemedaljewenner Chad le Clos het die geleentheid bygewoon.
“Een van die eerste dinge wat nogal koel is van die nuwe Windows is die prentjiewagwoord,” het Le Clos gesê terwyl hy Windows se nuwe wagwoord-stelsel op die proef gestel het.
Gebruikers van Windows 8 hoef nie meer 'n gewone wagwoord te gebruik nie, maar kan bloot op 'n spesifieke manier op 'n gekose foto kliek, of hulle vingers daaroor trek, om die stelsel te ontsluit.
Mteto Nyati, Microsoft SA se uitvoerende hoof, het aan Nuus24 gesê die visuele aspek van Windows 8 en die manier hoe dit op 'n raakskerm werk is veral van belang in 'n Afrika-konteks, omdat raakskerms en mobiele toestelle op die kontinent meer algemeen gebruik sal word as groter rekenaars.
“Jy moet verstaan, die mobiele tegnologie word oral deur inwoners van Afrika gebruik,” het hy gesê.
“Ons dink daar gaan 'n soortgelyke neiging wees in terme van tabletrekenaars, en die dryfkrag daaragter is die finansiering van tabletrekenaars of selfone deur selfoonmaatskappye.”
Tabletrekenaars kan op kontrakbasis van selfoonmaatskappye verkry word, wat dié toestelle meer gewild maak. Die nuwe voorkoms van Windows, wat baie meer geskik is vir raakskerms, sal dié bedryfstelsel 'n gewilde opsie maak.
Hy het ook gesê die ontwikkeling van toepassings vir Windows 8 kan baie beteken vir Afrika-entrepreneurs.
“Die ander dryfkrag vir hierdie [bedryfstelsel] sal die toepassings wees: Met die geleentheid wat Windows 8 deur middel van die Windows Store aan Afrikane sal gee om geld te maak uit toepassings, sal ons meer toepassings sien wat geskryf word, wat relevant is vir Afrika.”
Kyk hier na 'n video wat wys hoe Windows 8 se prentjiewagwoord-stelsel werk:
– Volg Nuus24 op Twitter.
