Wind-energie ‘n 'veilige alternatief'
2011-03-17 14:43
Johannesburg - Die kabinet het Donderdag aangekondig hy het ’n beleid (die IRP20) goedgekeur vir kragopwekking vir Suid-Afrika in die komende twee dekades, maar die belangegroep G7 Renewable Energies bevraagteken dié besluit.
“Suid-Afrika se nuwe energieplan, die geïntegreerde hulpbronplan (IRP) sal in April in die staatskoerant verskyn, terwyl die rol van kernkrag bevraagteken word,” het dr. Kilian Hagemann van G7 gesê.
Die IRP20 is gegrond op die vereiste dat kragopwekking gediversifiseer moet word met die klem daarop dat energiebronne uitgebrei moet word om gas, invoere, kernkrag, biobrandstof en hernieubare bronne in te sluit. Laasgenoemde sluit wind, son en water in.
“Alhoewel Suid-Afrika nie dieselfde geografiese probleme as Japan in die gesig staar nie, is daar altyd ‘n risiko as jy van kernkrag gebruik maak.
“Selfs al is voldoende maatstawwe moontlik, sal hulle duur wees om te implementeer,” het Hagemann verder gesê.
“Die kostes verbonde aan hernieubare energie soos windkrag sal laag wees in vergelyking met kernkrag.”
Hagemann voorspel dat die koste van kernkrag sal aanhou styg terwyl veiligheidsmaatreëls oorweeg word.
Die koste van koolstof-energie sal ook toeneem, terwyl beperkte hulpbronne opraak.
Die koste van hernieubare energie sal aan die ander kant afneem soos wat tegnologie verbeter, aangesien die insette, soos wind of sonlig, altyd gratis sal wees.
Volg Nuus24 op Twitter
- SAPA