Wildreservaat kry nuwe lewe
2012-01-04 11:29
Lilongwe – In slegs agt jaar het African Parks Network, ‘n Suid-Afrikaanse nie-regeringsorganisasie, meer as 2 500 diere in die Majete-wildreservaat langs die Shire-rivier in Malawi gevestig.
“Majete is ‘n suksesverhaal wat herinner aan Noag se Ark,” het Peter Fernhead, die hoof van die organisasie, met verwysing na die Bybelse verhaal van Noag, gesê.
Die reservaat is in 1955 gestig, maar wildstropers het met die tyd byna al die diere onwettig gejag.
Slegs ‘n paar bobbejane het in die 700 km2-park oorgebly toe African Parks die bestuur daarvan oorgeneem het en ‘n ooreenkoms met die Malawiese regering in 2003 aangegaan het.
“Daar was geen beheer nie. Die laaste olifant is in 1992 doodgeskiet,” het Patricio Ndadzela, die reservaat se direkteur, gesê.
‘n Paar dekades terug was daar honderde, het hy gesê.
“Geen toeriste het meer na die reservaat gegaan nie. Daar was niks gewees nie!”
Sedert die nuwe bestuur oorgeneem het, het Majete die nuwe tuiste van 742 impalas, 359 swartwitpense, 306 buffels, 250 olifante, 177 sebras, 158 vlakvarke, sewe swartrenosters en vier luiperds geword.
“Ons verskuif slegs die diere wat eens op ‘n tyd hier gevestig was,” het Fyson Suwedi, ‘n wildbewaarder, gesê. Dit beteken geen kameelperde of volstruise sal na die reservaat, wat heeltemal omhein is, geneem word nie.
Teen volgende Junie sal ‘n paar leeus na die reservaat geneem word om die Groot Vyf daar te vervolmaak.
– Volg Nuus24 op Twitter.
- Sapa - AFP