Wiki uit protes gesluit
2012-01-18 07:00
Johannesburg – Die gratis aanlyn-ensiklopedie Wikipedia gaan Woensdag sy Engelse weergawe vir 24 uur sluit uit protes teen twee beoogde Amerikaanse internetwette.
Die twee wetsontwerpe, die Stop Online Piracy Act (Sopa) en die PROTECT IP Act (Pipa), is daarop gemik om die onwettige besit van intellektuele eiendom, soos musiek en rolprente, te bekamp.
Kenners, webwerfeienaars en internetgebruikers is egter bekommerd dat dié wette kan lei tot sensorskap en inperking van vryheid van spraak.
Luidens ’n verklaring van die Wikimedia-stigting, die nie-winsgewende organisasie wat Wikipedia bedryf, het meer as 1 800 lede van die Wikipedia-gemeenskap binne 72 uur gestem vir die tydelike sluiting van die webwerf. Dit is die grootste vlak van gemeenskapsbetrokkenheid wat Wikipedia nóg ondervind het.
“Wikipediërs wêreldwyd het vandag hul teenkanting van dié vernietigende wetgewing uitgespreek,” het Jimmy Wales, Wikipedia-stigter, gesê.
“Dit is ’n buitengewone stap vir ’n gemeenskap om te doen, en terwyl dit ons spyt om die wêreld selfs ’n sekonde van toegang tot Wikipedia te ontneem, kan ons net nie die feit ignoreer dat Sopa en Pipa vryheid van spraak in die Verenigde State sowel as in die buiteland bedreig nie. Dit skep ook ’n kommerwekkende presedent vir internet-sensorskap oor die wêreld.”
Die webwerf sal van 07:00 Suid-Afrikaanse tyd ontoeganklik wees.
“Ons glo in ’n vry en oop internet waar inligting sonder belemmering gedeel kan word,” het Sue Gardner, uitvoerende direkteur van die Wikimedia-stigting, gesê.
Die Obama-regering het die naweek ’n verklaring uitgereik om te sê dit sal Sopa en Pipa in hul huidige vorm teenstaan.
“Hoewel ons glo aanlyn-diefstal deur buitelandse webwerwe is ’n ernstige probleem wat ’n ernstige wetgewende reaksie verg, sal ons nie wetgewing ondersteun wat vryheid van uitdrukking inperk, kuberveiligheidrisiko’s verhoog, of die dinamiese, innoverende globale internet ondermyn nie,” lui die verklaring.
– Volg Nuus24 op Twitter
- Beeld