Wetenskaplikes opgewonde oor ys op Mercurius

2012-11-30 15:08

Washington – Wetenskaplikes het tekens van ys in kraters naby Mercurius se pole ontdek – 'n ontdekking wat oor die lange duur van groot waarde kan wees in die soektog na lewe op ander planete.

Dié klein planeet is die naaste aan die son en roteer amper heeltemal regop, wat beteken dat party poolgebiede nooit sonlig kry nie.

“Daar is seker sowat 100 miljard metrieke ton ys op Mercurius,” het David Lawrence, ‘n navorser by Nasa, volgens Sky News gesê.

Die ontdekking is gemaak tydens die ontleding van data wat deur Nasa se Messenger-ruimtetuig na die aarde teruggestuur is. Die Messenger het in 2011 op die planeet geland.

Verdere ontleding van die data kan dalk ook meer verduidelik oor hoe lewe op die aarde self ontstaan het, het wetenskaplikes by ‘n mediakonferensie oor die ontdekking gesê.

– Volg Nuus24 op Twitter