Wetenskaplikes krap kop oor skaars walvisspesie
2012-11-06 12:28
Wellington – 'n Walvisspesie wat so skaars is dat niemand dit nog ooit lewend gesien het nie, het die wetenskaplike gemeenskap behoorlik aan't gons.
Die Mesoplodon traversii, 'n bitter skaarse spesie, het in 2010 in Nieu-Seeland gestrand – maar wetenskaplikes het dit nooit besef nie omdat die spesie verkeerd geïdentifiseer is voor dit begrawe is.
Dié ontdekking is gemaak toe monsters wat van die karkasse geneem is, maande later deur wetenskaplikes by die Universiteit van Auckland getoets is. Die monsters was van die Mesoplodon traversii-spesie.
Wetenskaplikes hoop dié ontdekking sal hulle help om die see en ander visspesies beter te verstaan.
Beendere van dié spesifieke spesie is nog net drie maal van tevore gevind. Twee van die vondse was in Nieu-Seeland, in 1872 en in die 1950's. Die laaste ontdekking was 26 jaar gelede in Chili.
“Dit is nogal fantasties,” het Ewan Fordyce, ‘n professor by die Universiteit van Otago, gesê.
“Hierdie is seker die skaarsste soogdierspesie op aarde.”
Wetenskaplikes weet amper niks van die spesie nie, behalwe dat dit in die suidelike Stille Oseaan voorkom en meestal inkvis eet.
“Hierdie is ‘n goeie herinnering van hoe groot die see werklik is en hoe min ons daarvan weet,” het Rochelle Constantine van die Universiteit van Auckland gesê.
– Volg Nuus24 op Twitter
- Sapa - AP
