Wetenskaplikes deel 'goeie nuus' oor biodiversiteit
2013-01-25 13:19
Wellington – Vrese dat die meeste van die plant- en dierspesies op aarde gaan uitsterf voordat hulle nog deur die wetenskap ontdek is, is “oordrewe”, het die uitslae van ‘n internasionale studie, wat Vrydag gepubliseer is, getoon.
Navorsers het ramings bestudeer wat aandui dat daar wêreldwyd 100 miljoen spesies is, en dat hulle uitsterf teen ‘n tempo van 5% per dekade. Dit beteken baie spesies sal verdwyn voordat wetenskaplikes ‘n kans kry om dit te ontdek.
Wetenskaplikes van Nieu-Seeland, Australië en Brittanje, het egter in die joernaal Science gesê dié ramings is gebaseer op ‘n oorskatting van hoe baie spesies nog onbekend is.
Hulle sê sowat 1,5 miljoen plant- en dierspesies is reeds aangeteken en statistiese modelle toon dat die aantal spesies wat bestaan nader is aan vyf miljoen as 100 miljoen.
Die uitslae van die studie, wat Vrydag vrygestel is, plaas die tempo waarteen spesies uitsterf op minder as 1% per dekade, wat slegs 'n vyfde van vorige ramings is.
“Ons bevindinge is potensieel goeie nuus vir die bewaring van globale biodiversiteit,” het die hoofnavorser, Mark Costello, van die Universiteit van Auckland, gesê.
“Oorskattings van die aantal spesies op aarde is selfvernietigend, want dit kan pogings om biodiversiteit te ontdek en te bewaar hopeloos laat lyk. Ons werk dui daarop dat dit nie naastenby die geval is nie.”
Hy sê die navorsing bied hoop dat al die spesies op aarde binne die volgende 50 jaar geïdentifiseer kan word, veral omdat die aantal taksonome, wetenskaplikes wat nuwe spesies beskryf, toeneem.
– Volg Nuus24 op Twitter
- Sapa - AFP
