Werk vorder aan Google-bril

2013-01-16 08:24

Google se medestigter, Sergey Brin, stel die Google Glass bekend. (Paul Sakuma, AP)

New York – Ontwikkelaars sal binnekort die geleentheid gegun word om sagteware te begin ontwikkel vir Google se jongste projek, Project Glass, het die tegnologieblog Mashable Woensdag berig.

Project Glass is die program agter Google Glass, 'n nuwe bril wat soos 'n slimfoon werk. Die bril, wat deur Google se Android-bedryfstelsel aangedryf sal word, vertoon data op die lense self.

Google het Dinsdag sy voorneme aangekondig om ontwikkelaars in San Francisco en New York twee volle dae kans te gee om met dié nuwe uitvindsel te speel, sodat derdeparty-sagteware daarvoor ontwikkel kan word.

Ingenieurs van Google sal ook beskikbaar wees om ontwikkelaars te help om sin te maak van dié nuwe tegnologie.

Sergey Brin, medestigter van Google, het die bril verlede jaar tydens die maatskappy se jaarlikse konferensie vir ontwikkelaars bekend gestel. Dit kan video opneem, weerverslae trek en boodskappe van vriende vertoon.

– Lees hier meer.

– Volg Nuus24 op Twitter.