Wêreld wonder oor 'geheime' tuig

2012-12-11 14:22

Washington – Terwyl die VSA gereed maak om Dinsdag 'n onbemande militêre ruimtetuig te lanseer, wonder die wêreld hard wat dié geheimsinnige tuig se doel kan wees.

Die X-37B, wat sowat vyf ton weeg en 8,9 m lank is, lyk soos 'n kleiner weergawe van die bekende Amerikaanse pendeltuie, en kan vir 'n lang tydperk in die ruimte bly.

Die laaste X-37B het in Junie van 'n sending teruggekeer ná 469 dae in die ruimte.

Amptenare het egter geen verdere inligting oor die X-37B se sending bekend gemaak nie.

Die geheimsinnige aard van dié militêre program het tot bespiegeling onder ruimtevaart-entoesiaste en selfs regerings gelei, met sommige moondhede wat meen die tuig kan later gebruik word om met satelliete te peuter.

Die X-37B-projek is in 1999 deur Nasa van stapel gestuur, waarna dit deur die Amerikaanse weermag oorgeneem is.

– Volg Nuus24 op Twitter
 

- Sapa - AFP