Wêreld se oudste hond sterf
2011-12-08 14:54
Tokio – Die land wat gewoond daaraan is om die lewens van die wêreld se oudste mense te vier, moes die afgelope week ‘n ander legende groet toe die wêreld se oudste hond in Japan dood is.
Pusuke, ‘n basterreun, het Maandagmiddag op die ryp ouderdom van 26 jaar en nege maande gesterf.
Dit maak hom die ekwivalent van meer as 120 mensejare, het berigte gelui.
Die dier het skielik geweier om te eet en dit het voorgekom asof hy sukkel om asem te haal ná baie jare van goeie gesondheid, het sy eienaar Yumiko Shinohara volgens Kyodo News gesê.
“Hy was vir 26 jaar saam met my en hy was soos my kind,” het die 42-jarige Shinohara aan die Yomiuri Shimbun gesê.
“Ek wil net vir hom dankie sê dat hy so lank gelewe het.”
Pusuke is ‘n jaar gelede deur die Guinness Book of Records erken as die oudste hond in die wêreld.
Japanners het van die langste lewensverwagting in die wêreld, wat deels toegeskryf kan word aan ‘n gesonde tradisionele dieet en ‘n aktiewe lewenstyl.
Die regering het in September bekendgemaak dat 37 uit elke 100 000 mense in die land meer as 100 jaar oud is, ‘n totaal van 47 700, waaronder 87% vroue.
– Volg Nuus24 op Twitter
- SAPA