Welpie verruil woonsteldak vir wolke
2011-11-10 09:07
Kaapstad – ’n Leeuwelpie van net twee maande het sowat 7 800 km gevlieg om ’n nuwe blyplek in Suid-Afrika te kry.
Little Leo, soos hy by die Drakenstein-leeupark buite die Paarl gedoop is, het Sondag in Suid-Afrika aangekom nadat hy uit Beiroet, Libanon, gered is.
Hy is op ’n woonstelbalkon op die 14de verdieping van ’n gebou gevind waar hy as ’n troeteldier aangehou is. Hy is met behulp van DHL Express en die Emirates-lugdiens na Suid-Afrika gebring.
Die nieregeringsorganisasies Animals Lebanon, Marchig Animal Welfare Trust en Elizabeth Elstob het ook ’n groot rol in die redding en hervestiging van Little Leo gespeel.
Volgens mnr. Paul Hart, eienaar van die leeupark, is dit nog te vroeg om te sê of Little Leo goed aanpas, maar dit gaan onder die omstandighede goed met hom.
“Hy het nog enkele gedragsprobleme. Hy was nooit in die buitelug nie en kyk elke keer op op soek na ’n dak bo sy kop (omdat hy in ’n woonstel aangehou is).
“Hy is die 35ste leeu wat ons al gered het en is tans die jongste.”
Hart het gesê Libanon het geen wette wat die aanhou van wilde diere as troeteldiere belet nie.
“Leeu- en jagluiperdwelpies word in Libanon ingesmokkel en as troeteldiere verkoop. Hul lewe is egter van korte duur as gevolg van onvoldoende diëte en onvoldoende skuiling.
“Dié wat wel oorleef, lewe dan in haglike omstandighede in hokke of private dieretuine,” het hy gesê.
– Volg Nuus24 op
Twitter.
- Die Burger