Wat van 'n koffie om 11:00?
2010-03-10 04:12
Londen - 'n Span kenners van 'n universiteit het met 'n formule vorendag gekom wat bewys dat 11:00 die beste tyd van die dag is vir 'n koffiebreuk.
Maar die navorsing wys ook dat dié lafenis nie die enigste vereiste is nie – ligte, musiek, aroma en goeie geselskap moet ook bygevoeg word.
Die navorsing is onderneem deur prof. Charles Spence van die departement van eksperimentele sielkunde aan die Oxford-universiteit.
Hy het gekyk hoe om goeie geur (F) met die perfekte omgewing (E), die houer waarin dit bedien word (P), met wie jy jou koffie drink (C) en die tyd van die dag wat jy jou koffiebreuk neem (T) kombineer om die mees genotvolle koffie-oomblik (M) te geniet.
Spence se formule vir die perfekte koffie was: M = 0.5 x F + 0.5 x E + 0.3 x P + 0.15 x C + 0.05 x T.
Hy het bevind dat 11:00 die beste tyd is om jou koffie in 'n goedbeligte kamer te drink met Marianne Faithfull wat in die agtergrond sing.
Spence se formule is gepubliseer in die verslag, Changing Tastes.
– Daily Mail