Walviskaflie uitgesit na hy uitspoel
2011-08-11 11:28
Melbourne – ‘n Walviskalfie wat gered is na hy op die Australiese kus uitgespoel het, sal uitgesit word omdat hy nie sy ma kon vind nie en weer uitgespoel het.
Die een week oue boggelrugwalvis is Woensdag op die Moreton-eiland aan die Goudkus gevind, twee dae na sy redders hom by Surfers Paradise-strand in die water ingesleep het.
“Dit is ‘n bitter hartseer oggend vir ons almal,” het Trevor Long, een van die redders gesê. “Bitter hartseer vir almal wat probeer het om hom terug aan sy ma te besorg.”
Long, van die SeaWorld-marinepark, het gesê die kalfie sal nie lank kan oorleef sonder die beskerming en voeding van sy ma nie.
Duisende mense het op die strand byeengekom en toegekyk hoe redders probeer het om die kleintjie ‘n tweede kans op die lewe te gee.
“Hy is nes ‘n mensbaba. Hy is afhanklik van sy ma,” het die direkteur van die Tangalooma Wild Dolphin Resort, Trevor Hassard, gesê.
– Volg Nuus24 op Twitter.
- AFP