Waarskuwing oor ‘natuurlike’ verslankmiddels
2010-10-16 23:41
Johannesburg – Dokters behoort pasiënte met vreemde simptome uit te vra oor hul gebruik van verslankingsmiddels wat oor die toonbank gekoop word en owerhede behoort dié produkte omvattend te toets.
So het ’n Hongkongse navorser vandeesweek gewaarsku nadat haar ontleding van 81
verslankingsprodukte wat mense siek gemaak het, getoon het dit bevat 12 onwettige aanvullings.
Dr. Magdalene Tang van die Prinses Magaret-hospitaal se toksikologiese laboratorium het 66 gevalle ondersoek waar mense simptome getoon het nadat hulle “natuurlike” verslankingsmiddels gedrink het.
Die gevalle is tussen 2004 en 2009 by die laboratorium aangemeld en dit was middels wat die mense oor die toonbank of op die internet gekoop het.
Luidens die studie wat in eergister se uitgawe van die British Journal of Clinical Pharmacology gepubliseer is, is een mens dood en agt se simptome was ernstig.
’n Kwart van die produkte het net een onwettige bestanddeel gehad, 48% het twee bevat en een produk ses.
73% van die produkte het die voorskrifmiddel sibutramien bevat wat pas aan die mark vir voorskrifmedisyne onttrek is weens vrese dat dit kan lei tot ’n groter risiko om ’n hartaanval of beroerte te kry.
Daar was ook analaloë (struktureel aangepaste vorms) van sibutramien wat in vorige studies verbind is met lewerskade.
Sowat 16% van die produkte het fenfluramien bevat. Dit is ’n dieetmiddel wat die serotonienvlak verhoog en in 1997 aan die mark onttrek is ná gevalle van hartklepsiekte.
’n Derde van die middels het fenolftaleïen bevat. Dit is ’n lakseermiddel wat aan die mark onttrek is nadat studies getoon het dit kan kanker veroorsaak.
“Mense hou van die idee om ’n natuurlike produk te gebruik omdat hulle glo natuurlik is veilig.
“Daar is twee probleme. Nie alle natuurlike middels is skadeloos nie en van die middels bevat potensieel gevaarlike vervaardigde medisyne,” het Tang aan EurekAlert! gesê.
Sy stel voor dat die owerhede eerder breëspektrum-siftingstoetse op sulke produkte doen as die huidige metode om verdagte middels vir spesifieke bestand-dele te probeer toets.
Volg Nuus24 op Twitter.