WB laat Twitter gons
2010-06-12 14:27
Washington – Twitter, wat hierdie week al verskeie onderbrekings ervaar het, het Vrydag gewaarsku dat daar nog probleme kan opduik te midde swaar verkeer tydens die Wêreldbeker-sokkertoernooi.
Volgens Jean-Paul Cozzatti, ‘n ingenieur vir Twitter, was die probleme die week as gevolg van ‘n interne netwerk wat oor sy kapasiteit was.
Cozzatti het bygevoeg dat Twitter hul kapasiteit verdubbel het en dat hulle verkeer op die netwerk herbalanseer om die lading te versprei.
Wanneer Twitter afgaan verskyn daar ‘n prent van ‘n walvis wat bekendstaan as “fail whale” en Cozzatti het gesê dat sy ingenieurspan gehoop het dat die kreatuur minder sal verskyn.
“Jy sal nog die walvis sien as daar ongehoorde toenames in verkeer op die webwerf is,” het hy gesê.
“Byvoorbeeld gedurende die Wêreldbeker-sokkertoernooi – en veral gedurende taai wedstryde wat deur baie mense gekyk word – verwag ons dat daar ‘n merkwaardige toename in aktiwiteite op Twitter sal wees.”
Volg Nuus24 op Twitter
- Sapa - AFP