Vreemdelinge kan nou op Facebook luister
2011-09-15 10:40
Kaapstad – Facebook het ‘n nuwe Subscribe-knop bekendgestel wat vreemdelinge in staat stel om toegang tot gebruikers se jongste brokkies te kry.
Die nuwe inskryffunksie is glo deel van Facebook se planne om gebruikers meer beheer oor hul nuusvoer op die sosiale netwerk te gee, het die sosiale netwerk op sy blog bekendgemaak.
“Facebook se doel is om gebruikers meer beheer te gee,” het Naomi Gleit, die maatskappy se produkbestuurder, gesê.
Gebruikers sal voortaan die Subscribe-knop langs ou bekendes soos die Message-knop en die Poke-knop sien.
Intekenaars sal dan die gebruiker se brokkies, wat met die privaatheidverstellings "publiek" gemaak is, in hul nuusvoer kan sien soortgelyk as om iemand op Twitter te volg.
‘n Intekenaar hoef nie Facebook-vriende met die gesogte gebruiker te wees nie.
Gebruikers kan hier 'n Subscribe-knop aan hul Facebook-profiel sit.
– Volg Nuus24 op Twitter.
- Nuus24