Vragkapsule kom veilig aan by ruimtestasie

2012-10-11 11:21

Cape Canaveral – ‘n Vragkapsule met voedsel en toerusting het Woensdagoggend die Internasionale Ruimtestasie (IRS) bereik om die vrag af te lewer.

Die kapsule, genaamd Dragon, het die IRS bereik na twee en ‘n halwe dae se reis. Die bemanning van die IRS het ‘n robotarm gebruik om die kapsule te gryp.

Die sending – die eerste van 12 beplande lanserings in die Amerikaanse maatskappy se kontrak van $1,6 miljard (sowat R14 miljard) met Nasa – is 'n groot mylpaal vir die VSA se pogings om die ruimtereis-bedryf te privatiseer.

Die Dragon bevat sowat 453 kg se kruideniersware, klere, eksperimente en ander toerusiting, insluitend roomys vir die drie bemanningslede in die IRS. Die Dragon sal sowat drie weke by die IRS bly voordat dit met ‘n vol vrag terug aarde toe vertrek.

Dragon is die enigste vragskip wat navorsing en ander items terugbring aarde toe.
 
– Volg Nuus24 op Twitter

- AP