Vodacom ontketen herrie oor internet
2011-09-14 08:00
Johannesburg – Vodacom moes gister bont staan om aan BlackBerry-gebruikers te verduidelik ’n onlangse besluit om ’n spoedlimiet op die gebruik van BlackBerry-internetdienste (BIS) te plaas sal in die meeste gebruikers se guns tel.
Dít volg nadat Vodacom Maandag aangekondig het BIS-gebruikers wat meer as 100 MB se data per maand gebruik se internetspoed sal outomaties van die 3G-netwerk na die veel stadiger 2G-netwerk afgeskaal word.
“Ons het besef 95% van BlackBerry-data wat tans gebruik word, kan aan 5% van BlackBerry-gebruikers toegeskryf word,” lui Vodacom se verklaring.
“Daar is gevolglik besluit om stappe te doen om te verseker dat diegene wat die diens misbruik ander gebruikers wat die BIS-dienste regverdig gebruik, nie langer sal kan benadeel nie.”
Dié perk geld vir die gratis, onbeperkte BIS-dienste wat BlackBerry-eienaars vir internet-swerf (browsing) geniet.
Die aflaai van data soos toepassings en e-posaanhangsels, waarvoor BlackBerry-gebruikers wel betaal, word nie deur die spoedperk geraak nie.
Gebruikers, waarvan baie onder die indruk was die limiet kom neer op ’n databeperking (cap) vir BIS-dienste, het Dinsdag veral op Twitter sterk uitgevaar.
“Ons het juis BlackBerries vir die onbeperkte BIS gekoop, dit was die verkoopspunt! Hou julle verslegtende netwerkdienste,” het ene @regoworld gesê.
Louis Oelofse, ’n eNews Channel-joernalis, het op Twitter gevra of hy, as Vodacom die voorvereistes van BlackBerry-dienste deur die bank gaan verander, sy kontrak kan sluit.
@frisbee het gesê hy sal sy kontrak skuif. “Gelukkig verval my Vodacom-kontrak amper. Enige voorstelle vir BlackBerry-opsies op ander netwerke?”
Richard Boorman, woordvoerder van Vodacom, het Dinsdag gesê die meeste mense het die aankondiging verkeerd verstaan. “Dit behels ’n spoedlimiet vir die enkele gebruikers wat die BIS-dienste misbruik en is geensins ’n databeperking vir álle BlackBerry-gebruikers nie,” het Boorman gesê.
Vodacom het op hul Twitter-blad, @vodacom, vure probeer doodslaan deur gebruikers te verseker: hul gratis BIS-dienste sal steeds onbeperk bly; dat slegs internetspoed vir enkele gebruikers geraak sal word; dat 95% van BlackBerry-gebruikers in elk geval nooit 100 MB per maand oorskry nie; en dat meeste gebruikers weens die besluit vinniger internet sal ervaar.
Boorman het gesê Vodacom het juis tot dié besluit gekom om BlackBerry-gebruikers te bevoordeel.
Hy het gesê een selfoonkliënt kon daarin slaag om met die hulp van sagteware sy selfoon as ’n modem te gebruik en kon in een maand 300 GB data aflaai.
– Volg Nuus24 op Twitter
- Beeld