Vloek op TV verbind met aggressie by kinders
2011-10-20 11:30
Kinders wat vloekwoorde op televisie en in videospeletjies hoor, is meer geneig om aggressief teen hul maats op te tree, het ‘n studie bevind.
Die bevindinge, wat in die joernaal Pediatrics gepubliseer is, bied meer duidelikheid oor die vraag of geweld en kru taal in die media kinders se gedrag beïnvloed.
Navorsers het 223 leerders by ‘n laerskool in Amerika bestudeer en bevind dié wat baie kru taal op televisie en videospeletjies gehoor het, was self meer geneig om te vloek.
Kinders wat meer geneig was om te vloek, was ook meer geneig om aggressief op te tree, het die navorsers bevind.
Kru taal en geweld in die media maak egter nie die kinders aggressief nie, het die hoofnavorser Sarah Coyne van die Brigham Young-universiteit in Utah, Amerika egter gesê.
“Die studie wys ‘n verband” en dit bewys nie ‘n oorsaak-en-gevolg-verhouding nie, het sy gesê .
“Daar is baie ander faktore wat tot aggressiewe gedrag bydra,” het Coyne gesê.
– Volg Nuus24 op Twitter.
- Reuters
