Vliegtuig wat met sonkrag vlieg, getoets
2010-04-07 08:48
Johannesburg – Die eerste lugvaartuig wat ontwerp is om dag en nag sonder brandstof te vlieg, onderneem vandag sy eerste toetsvlug vanuit Payerne in Switserland.
Die HB-SIA, soos die vliegtuig bekend is, is die geesteskind van Bertrand Piccard, president van Solar Impulse, die maatskappy wat dié sonkragaangedrewe prototipe-vliegtuig ontwerp en gebou het.
Die prototipe is in Junie verlede jaar in Zürich onthul. Die vlerkspan van 63,4 m is vergelykbaar met ’n Airbus A340, maar teen 1 600 kg weeg dit soveel soos ’n gemiddelde motor.
“Gister was dit ’n droom. Vandag is dit ’n vliegtuig. Môre sal dit die ambassadeur van hernubare energie wees,” het Piccard toe gesê.
Geen lugvaartuig wat so groot, maar so lig is, is al tevore gebou nie.
Die toetsvlug sal na verwagting 90 minute duur en die tuig behoort ’n hoogte van 1 000 m te bereik.
Reuters het berig die vliegtuig kombineer vindingryke aërodinamiese eienskappe, nuwe liggewig-boumateriaal sterk genoeg om die druk by hoë hoogtes te weerstaan en gevorderde sonkragtegnologie.
“As ’n vliegtuig daarin kan slaag om dag en nag sonder brandstof te vlieg met slegs sonkrag wat dit aandryf, sal niemand meer kan sê dis onmoontlik om dieselfde in motors en rekenaars reg te kry nie,” het Piccard gesê.
Die vliegtuig word deur vier elektriese motors in die lug gehou.
Ongeveer 12 000 sonselle is in die vlerke gebou en dit verskaf die motors met hernubare energie en laai boonop sy batterye gedurende die dag sodat dit ook snags kan vlieg.
Maar met ’n gemiddelde vliegspoed van 70 km/h sal dit nie binnekort enige spoedrekords breek nie.
– Beeld