Vlieënde verskynsel in Pretoria?
2010-07-26 12:28
Beeld
Pretoria – ‘n Ongeïdentifiseerde vlieënde voorwerp, wat glo uit drie helder ligte bestaan, het inwoners van Booysens in Pretoria vir twee agtereenvolgende aande stomgeslaan.
Engela van der Spuy (67), wat in Attiestraat in Booysens woon, het Beeld gekontak nadat sy Donderdagaand, vir die tweede keer, die vreemde stel ligte gesien het.
“Ek sê nie dit is klein groen mannetjies nie,” het Van der Spuy gesê.
“Ons wil regtig net weet wat dit is.”
Van der Spuy het die vlieënde voorwerp Woensdagaand, kort na sonsondergang vir die eerste keer gesien.
“Ek kon nie die vorm van die voorwerp uitmaak nie, omdat die drie ligte te helder geskyn het. Maar dit het gelyk of dit ‘n hart-vorm gehad het. Daar was twee ligte aan die bokant, ‘n blou lig aan die linkerkant en ‘n smaraggroen-lig langsaan. Aan die regterkant was ‘n helder wit lig,” het sy gesê.
Volgens haar het die vlieënde voorwerp vir ongeveer twee ure in die lug gehang sonder om te beweeg. Teen 20:30 het dit stadig na onder beweeg en agter die horison verdwyn.
Donderdagaand het die vlieënde voorwerp kort na sonsondergang omstreeks 20:30 wéér sy verskyning gemaak. Dit het weer afwaarts beweeg voordat dit verdwyn het.
“Ek het al die buurmense geroep en ons het saam na die voorwerp gekyk. Niemand kon egter sien wat dit is nie. Al wat ons weet is dat dit beslis nie ‘n ster of normale vliegtuig was nie.”
Henrico Swart (19), Van der Spuy se buurman, het deur sy verkyker na die vlieënde voorwerp gekyk en was stomgeslaan.
“Dit moet ‘n vreemde vorm hê, want alhoewel ek deur deur die verkyker gekyk het, kon ek steeds nie die vorm uitmaak nie,” het Swart gesê.
“Al wat ek kon sien was die drie helder ligte.”
Die polisiestasie in Hercules, Johannesburg Planetarium en die Suid-Afrikaanse Lugmag het nie kennis gedra van die insident nie en kon nie die verskynsel verduidelik nie.
- Beeld